သ္ၚဳဂၠိပ်ပရေင်ၜိုဟ်လလံ – ဂိတုမေ
ပ္ဍဲကၟိန်ဍုင်ဗၟာဝွံ တုဲကၠုင်ဂိတုမေဂှ် ဒးဒုင်ကၠုင်လဝ် ဘဲလဗိုတ်ကျာမဳလံင် “မဝ်ခါ” (Mocha) မွဲချိုန်ခဏကီုရ။ ညးဍုင်ကွာန်ဂမၠိုင်ဝွံ ဟိုတ်နူဒးဒုင်ကၠုင်လဝ် ဘဲပၞာန်ကီု သီုဒးထပ်ဒုင်ကၠုင် ဘဲဒဏ်သဘာဝဂှ်ရ ဂိတုဲ ဂိဟဍင်ရ။ ဟိုတ်ဂှ်ရ နနဲကျာမဳလံင် (Mocha) လုပ်ကၠုင်မွဲခဏတုဲ တိတ်အာဂှ် ညးမပၠံင်ၜကေတ်လဝ် အဝဵုကၟိန်ဍုင် တၠအဝဵုကံင်ဇြဳပၞာန်တံလေဝ် သွက်သ္ဂောံတိတ်အာ နူခုင်ပရေင်ဍုင်ကွာန်ဂှ် ညးဍုင်ကွာန်တံ နွံပၟိက်တဴမံင်အိုတ်ရ။ ဆ္ဂး ကံင်ဇြဳပၞာန်တအ် ဂွံတိတ်အာ နူဇရေင် ပရေင်ဍုင်ကွာန်ဂှ် အစဳဇန်ဟၟဲဏီရ။ ဒပ်ကံင်ဇြဳပၞာန်တံဂှ်လေဝ် ဆက်တုဲကလိလောန်မံင် ပရေင်ဂစိုတ်ဂယိုင်ကီု၊ သီုရပ်စုတ်မံင် သ္ၚိစာတ် (ဝါ) ထံင် လ္တူညးဍုင်ကွာန်တအ်ရ။ ပ္ဍဲလိခ်သ္ၚဳဂၠိပ်ပရေင်ၜိုဟ်လလံ သွက်ဂိတုဏံမ္ဂး အကာဲအရာဂကောံအာဂတပၠတရဴ ပရေင်ၜိုဟ်လလံ (PPST)တအ်ဂှ် ဂွံဗှ်ကေတ်မာန်တုဲ ပရူပရာ ဒပ်ကံင်ဇြဳပၞာန်တံ ဖံက်ပလီုမံင် အခေါင်အရာမၞိဟ် လ္တူညးဗြဴ ကေုာံ လ္တူကောန်ၚာ်ဂှ်လေဝ် ချူထ္ၜးလဝ်ရောင်။ ပ္ဍဲကၟိန်ဍုင်ဝွံ ပဋိပက္ခရပ်လွဟ် ဒှ်မံင်အလုံကၟိန်ဍုင်မွဲတုဲ အကာဲအရာဒေသ လၟိဟ်ပေါဲဗတိုက်ဂၠိုင်အိုတ် မပ္တံ တွဵုရးဍုင်ကရေင်၊ ရးဒေသဇၞော်သကိုင် (စစ်ကိုင်းတိုင်း)၊ တွဵုရးဍုင်ချေင်တအ်ဂှ် ပ္တိုန်ထ္ၜးလဝ်နွံတုဲ ကၟိန်ဍုင်သ္အာင်ဂမၠိုင်တအ် စပ်ကဵုပရေင်ဍုင်ဗၟာတ္ၚဲဏံတုဲ မုရဴညးတံဟီုလဝ်ဂှ်လေဝ် ဗှ်လ္ၚတ်အာမာန်ရ။
