သ္ၚဳဂၠိပ်ပရေင်ၜိုဟ်လလံ – ဂိတုဂျောန်
ကံင်ဇြဳပၞာန်ဗၟာကေုာံ ညးဗက်လက္ကရဴ ကံင်ဇြဳပၞာန်ဗၟာတံဝွံ သ္ပမာန်ကဵု လွဟ်လနက်တုဲ သီကေတ်အဝဵု နူညးဍုင်ကွာန်ဂှ်ရ ဒးဒုင်ဗတိုက်သရိုဟ်ကၠုင်မံင် ဂေတ်ကၠောံ နကဵုဂကောံပၠန်ဂတးဂမၠိုင်တံဂှ် အတိုင်သဘဴဓရ် ”ဍဵုခဍင် တိုန်ခဍင်” ရ။ အကြာပရေင်ပၠန်ဂတးတမ်က္ညင် သ္ကာတ်မြဟ်မံင်ဂှ် အလဵုအသဳကရေင်ဍာဲခေတ်တၟိ ဗီုပြင်ဍတ်တိတ် မံက်တိုန်ကၠုင်မာန်တုဲ တင်ဒတူဒလိုင် ပရေင်ဍုင်ကွာန်ညးတအ်ဂှ် ပ္ဍဲလိခ်သ္ၚဳဂၠိပ်ပရေင်ၜိုဟ်လလံ သွက်ဂိတုဏံ ဓမံက်ထ္ၜးလဝ်ရ။ မွဲအဆက်ဓဝ် စပ်ကဵုဒေသတွဵုရးဍုင်မန် က္တဵုဒှ်မံင်အခိင်လၟုဟ်ဂှ် ဒပ်ပၞာန်ဗော်သွးဂကူကရေင် (KNU/KNLA) တအ် ထပ်ပံက်အာ ဒပ်မဟာ (၈) ဂှ်လေဝ် ဗှ်လ္ၚတ်အာမာန်တုဲ နကဵုဗော်ဍုင်မန်တၟိတအ် တင်စဵုဒၞာပရေင်ဂကူကီု သီုကဵုတိဍာ်ထိင်ဒဝ်တံ ညံင်ဂွိုအ်ဆောံလင်အာမာန်ကီုဂှ် ဗီုပြင်လဵု စဵုဒၞာထိင်ဒဝ်အာဂှ်ရော? အခေါင်အရာဂကူဇကု ဇကုညံင်ဂွံဖန်ဖက်ကေတ်မာန်ဂှ် ပံင်တောဲကဵု ဂကောံပၠန်ဂတးတုဲ ဗတိုက်အာ တၠအဝဵုပၞာန်ဟာ? ဟွံသေင်မ္ဂး ဒုင်ဆောံလေင်တိဍာ်၊ ဒုင်ဆောံလေင် ဂုဏ်သိက္ခာပရေင်ဍုင်ကွာန်တုဲ မံင်အာသၟဝ်တဲ တၠအဝဵုပၞာန်ဟာ? ကံင်ဇြဳပၞာန်တအ် ကလိလောန်မံင် ဒုဟ်ရာဇဝတ်ပၞာန် လ္တူညးဗြဴကဵု ကောန်ၚာ်တံဂှ်လေဝ် ချူပတိုန်ထ္ၜးလဝ်နွံတုဲ လ္တူအကာဲအရာ ကၟိန်ဍုင်ဗၟာဝွံ လညာတ်ကၟိန်ဍုင်သ္အာင်တအ်ဂှ်လေဝ် ဗှ်လ္ၚတ်သ္ၚဳဂၠိပ်အာ ဗၠးဗၠးၜးၜးမာန်ရ။