AUDIO PODCAST: 
နိဒါန်သၞာံ၂၀၂၆ နူ ဂျာန်ညဝ်ဝါရဳ ၁၃ စိုပ်ဝှာပ်ဘျဝ်ဝါရဳ ၁၂ ဂှ် ပေါဲဗတိုက် ဒှ်ကၠုင် ၈ အလန်ရ။ တွဵုရးဍုင်မန် ဒကုတ်သၠုင်ကျာ ပွိုင်ဍုင်ရေဝ်ဂှ် ၃ အလန်၊ ဒကုတ်သၟဝ်ကျာ ပွိုင်ဍုင်ကျာ်ထဝ်ဂှ် ၂ အလန်၊ ပွိုင်ဍုင်ၜဳလေင်ဂှ် ၃ အလန် ကတဵုဒှ်ကၠုင် ပေါဲဗတိုက်ရ။ ကလေင်ပါ်ပါဲ လတူပေါဲဗတိုက်ဏအ်မ္ဂး ဟိုတ်နူ ကံင်ဇြဳပၞာန် လုပ်ထပက်ပၞာန်တုဲ ပ္ဍဲတိဍာ်ဗော်သွးကောန်ဂကူကရေၚ် (KNU) ခရိုင်ဒူတထူ ကဵု ခရိုၚ်ဒူပလာယာတအ်ဂှ် ဒှ်ကၠုင်ပေါဲဗတိုက်ရ။
ခံက်အင်ပေါဲဗတိုက်
လၟေင်။ စၟတ်တ္ၚဲ။ ပွိုင်ဍုင်။ ကွာန်
၁ ဝှာပ်ဘျဝ်ဝါရဳ (၉) ကျာ်ထဝ် မုက္ခမော့
၂ ဝှာပ်ဘျဝ်ဝါရဳ (၉) ကျာ်ထဝ် ခရွဲ
၃ ဝှာပ်ဘျဝ်ဝါရဳ (၈) ၜဳလေင် ဖိုးဝါးသိမ်
၄ ဝှာပ်ဘျဝ်ဝါရဳ (၇) ၜဳလေင် ညောင်ထောက်
၅ ဝှာပ်ဘျဝ်ဝါရဳ (၃) ရေဝ်။ ကွာန်ဘာ
၆ ဂျာန်ညဝ်ဝါရဳ (၂၆) ၜဳလေင် အလူးလေး
၇ ဂျာန်ညဝ်ဝါရဳ (၁၈) ရေဝ် ကၞေင်တၟအ်
၈ ဂျာန်ညဝ်ဝါရဳ (၁၅) ရေဝ် အောၚ်သပြေ
ပေါဲဗတိုက်ဆက်ဒၟံင် ပ္ဍဲသၟဝ်ကျာတွဵုရးဍုင်မန်
ဝှာပ်ဘျဝ်ဝါရဳ ၈ ဂှ် ကံင်ဇြဳပၞာန်တအ် ထပက်ကၠုင်ပၞာန် ပ္ဍဲတိဍာ်ဗော်သွးကောန်ဂကူကရေၚ် (KNU) ခရိုင်ဒူတထူ၊ ပွိုင်ဍုင်ကျာ်ထဝ်တုဲ ဝှာပ်ဘျဝ်ဝါရဳ ၉ ဂှ် ဒှ်ကၠုင်ပေါဲဗတိုက် အကြာဒြဟတ်ၜါလ္ပာ်ရ။ ပ္ဍဲကွာန် မုက္ခမော့ ကဵု ကွာန်ခရွဲ ဂှ် ဒှ်ကၠုင်ပေါဲဗတိုက် ကဵုဂကောမ်ရပ်လွဟ်ပံင်ကောမ် (KNU/KNLA) မက္ဍိုက်က္ဍိုပ်တအ်ရ။ ပ္ဍဲပေါဲဗတိုက်ဂှ် တမ်ဒပ် ခမရ (၂၀၇) ကဵု တမ်ဒပ်အမၠံက် (၃၁၀) မဖျေဟ်လဝ် သဇိုင်ပ္ဍဲသိမ်ဇရပ်တအ်ဂှ် ဘိုင်ခ္ဍိုၚ်ပန် နကဵုလွဟ်ဇၞော်တုဲ လ္ပာ်ဒပ်ပၠန်ဂတးတအ် ကောန်သ္ဂံင် ပြဟ်လလုဲအာ ၃ တၠရ။
ပါဲနူဂှ်ပၠန် ဝှာပ်ဘျဝ်ဝါရဳ ၁၀ အခိင်သဝ်တ္ၚဲဂှ် ကံင်ဇြဳပၞာန်တအ် လုပ်ကၠုင်ကွာန်ကျောက်ရေတွင်းတုဲ ရပ်ဏာညးကွာန် ၃၀ တၠ နဒဒှ် ညးဒုင်ချိုတ် ပ္ဍဲမုက်ပၞာန်ရ။ ကၠာဟွံဂွံဒှ် ပေါဲဗတိုက် ညးသကအ်ဏီ ပ္ဍဲဂျာန်ညဝ်ဝါရဳ ၃၁ ဂှ် ပေါဲဗတိုက်ဟွံမွဲ,မွဲသာ် ဂြာတ်ဏာမခတိုဟ်၂ မ နကဵုက္ၜင်ကျာတုဲ ပ္ဍဲကွာန်ကျောက်ရေတွၚ်းဂှ် သ္ၚိမွဲမ ကောမ်ကု တၞံထၜိုတ်လ္ၚဵုတအ် လီုလာ်ဆောမ်လေင်အာရ။ နူကဵုတမ်ဒပ်အမၠံက် (၃၁၀) ဂှ်လေဝ် ခ္ဍိုၚ်ပန်ပၠုပ်လဝ် နလွဟ်ဇၞော် (၂) မ ပ္ဍဲတ္ၚဲဝွံရ။
ပ္ဍဲပွိုင်ဍုင်ၜဳလေင် ခရိုင်ဒူထထူဂှ်မ္ဂး စနူဝှာပ်ဘျဝ်ဝါရဳ (၇) ကံင်ဇြဳပၞာန်တအ် ပတဝ်ဏာက္ဍိုပ် ကဵုကွာန်ညောင်ထောက်တုဲ ပ္ဍဲကွာန်အလူးကြီး၊ ကွာန်ချမ်းမြေ့စု၊ ကွာန်ဖိုးဝါးသိမ်တအ် ပါ်ကရောင်ပၞာန် (၃) ကရောင်တုဲ လုပ်ဗတိုက်ကၠုင် မွဲအလန်ဓဝ်ရ။ ပ္ဍဲဝှာပ်ဘျဝ်ဝါရဳ (၇) ဂှ်ဟေင် ဒှ်ကၠုင်ပေါဲဗတိုက် ပ္ဍဲကွာန်ညောင်ထောက် ကဵုကွာန်ဖိုးဝါးသိမ်တအ်တုဲ သ္ၚိမၞုံပ္ဍဲကွာန်တအ် နလၟိဟ် (၂)မ ကရောင်ကံင်ဇြဳပၞာန် မွဲကရောၚ်ဂှ် စံင်ပလီုထောအ်လဝ်တုဲ ဖျေဟ်လဝ်ဒပ် ပ္ဍဲကွာန်ဖိုးဝါးသိမ် ၜိုတ် (၃) တ္ၚဲရ။
ဟိုတ်နူပေါဲဗတိုက်ဂှ်တုဲ ညးကွာန် နူကွာန်ညောင်ထောက်၊ အလူးကြီး၊ ဖိုးဝါးသိမ်၊ ချမ်းမြေ့စု၊ ဝင်းသောင်၊ ရှမ်းစု၊ သရက်ကုန်း ၜိုတ်စှ်ကွာန်တအ် ညးပါဲဓလေတ်ဘဲပၞာန် ၜိုတ် ၅၀၀၀ တၠနွံရ။ ဝှာပ်ဘျဝ်ဝါရဳ (၁၁) ဂှ် ကံင်ဇြဳပၞာန်တအ် တိတ်ကၠုင်နူကွာန် ဖိုးဝါးသိမ်တုဲ ဆက်ဖျေဟ်လဝ်ဒပ် ပ္ဍဲကွာန်အလူးကြီးရ။ ပြဟ်ပြဟ်ဏအ် ပ္ဍဲခရိုင်ဒူတထူဂှ် အကာဲအရာပရေင်ပၞာန် သီုၜါလ္ပာ် ကြံင်မ္ၚိုဟ်ဒၟံင်ရ။
ပြေင်လဝ်ဒပ် ပ္ဍဲဂၠံင် ရေဝ်-ဇြပ်ဗု
ပ္ဍဲပွိုင်ဍုင်ရေဝ်ဂှ်ဝွံ အဃောကၠောန်ပေါဲရုဲမာဲ ဒကုတ်(၂)ဂှ် ကံင်ဇြဳပၞာန်တအ် ဖျေဟ်လဝ်ဂီုကၠီု လ္တူဍုၚ်ရေဝ်ကီု သီုပ္ဍဲတမ်ဒပ်ဍေံတအ်ကဵု ပ္ဍဲဒပ်ကင်တအ်ဟေင်ရ။ ပေါဲရုဲမာဲ တုဲဒှ်ဗက် ဂိတုဂျာန်ညဝ်ဝါရဳ သတ္တဟဒုတိယဂှ် ကံင်ဇြဳပၞာန်တအ် ကလေင်ထပက်ကၠုင်ပၞာန်ရ။ ကံင်ဇြဳပၞာန်တအ် ထပက်ကၠုင်ပၞာန် နူရေဝ်သၟဝ်ကျာ ကွာန်တၟအ်ကၞေင် စဵုစိုပ်ပယျဵုဇြပ်ဗု ကွာန်အံင်ရေင် (အောၚ်သပြေ) ဂှ် ဂွံညာတ်ကေတ်ရ။ ဟိုတ်နူအကာဲအရာဂှ်ရ စဵုစိုပ် ဂျာန်ညဝ်ဝါရဳ (၁၅) ဂကောံမဓလီုလဝ် ဂၠံင်တအ် မပတမ် ဂကောံမၞုံသၟဝ်ပၠတရဴ MSFC (၂) ဂကောံ MSRF,YPDF တအ် ဒှ်ကၠုင်ပေါဲဗတိုက် ကဵုကံင်ဇြဳပၞာန်ရ။ ဂျာန်ညဝ်ဝါရဳ (၁၈) ဂှ်လေဝ် ဗ္ဒါဲကွာန်ကၞေင်တၟအ်မွဲဒၞါဲဂှ် ကံင်ဇြဳပၞာန် ကဵု ဂကောမ်ပၠန်ဂတးတအ် ဒှ်ကၠုင်ပေါဲဗတိုက်နွံရ။
တုဲပၠန် မာ်မွဲစွေက် တ္ၚဲကောန်ဂကူမန်တုဲဗက် ဝှာပ်ဘျဝ်ဝါရဳ (၃) နူဂယး ၜိုတ် (၅) နာဍဳဂှ် ဒပ်မန်ရာမည (NMSP-AD/RMA) တမ်ဒပ်လၟိဟ် (၉၀၄)၊ ဒပ်ပၞာန်ဗၠးၜးကောန်ဂကူကရေင် (KNU/KNLA) တမ်ဒပ်လၟိဟ် (၂၇)၊ ဒမ်တပ်လၟိဟ်(၈၀၀၁) YGF တအ် ပံင်ကောမ်တုဲ လုပ်ဗတိုက်လဝ် တမ်ဒပ်ခမရ (၅၉၁) မနွံဗ္ဒါဲကွာန်ဘာဂှ်ရ။ ဟိုတ်နူပေါဲဗတိုက်ဂှ်တုဲ လွဟ်ဇၞော် (၄၀) မမ မွဲမ ခတိုဟ်အာ အပ္ဍဲကွာန်ဘာတုဲ ဂၠံင်ရေဝ်-ကွာန်ဘာဂှ် ကံင်ဇြဳပၞာန်တအ် ကၟာတ်ထောအ် ဗၞတ်ကဵုနာဍဳရ။ ပရေင်ချဳဓရိုင် ကံင်ဇြဳပၞာန်ဂှ် ပတဝ်လဝ်က္ဍိုပ် ကဵုဂၠံင်ဇၞော်ကၟိန်ဍုင် စၟတ်(၈) ဒကုတ်ဂၠံင် ရေဝ်-ဇြပ်ဗုဏောင် ဟီုစဂွံရ။
ဝှာပ်ဘျဝ်ဝါရဳ (၇) တုဲကၠုင်တေအ်ဂှ် နူဌာန်ဂအုပ်ပၞာန် ရးအဂၞဲဗၟာ (အရှေ့တောင်တိုင်းစစ်ဌာချုပ်) မၞုံလ္တူဍုၚ်မတ်မလီုတေအ် နကဵုကွဳစက် (၂၀) ဖ္ဍိုက် ပတိုန်လဝ်လွဟ်ဇၞော်တုဲ ကၠုင်ဗပေင်လဝ်ဇြဟတ် ပ္ဍဲတမ်ဒပ်အမၠံက်(၃၁၅) မၞုံပွိုင်ဍုင်ဇြပ်ဗု ကွာန်ဝါကလဳ ရဴဝွံ ညးဍုင်ကွာန်တအ် ဟီုလဝ်ကဵု ဌာန်ပရိုင်ဗၠးၜးမန်ရ။ ဣဏအ်ဂှ် လောန်ကာဲနူ ဗပေင်ဇြဟတ် ဓမ္မတာရောင် ဟီုစဂွံရ။ ပ္ဍဲကွဳစက်တအ် လွဟ်ကမ်ဇၞော်တအ် ပါကၠုင်ဒၟံင်ဂှ် ဒှ်လက္ချဏ် ကလေင်သီ ဂၠံင်ရေဝ်-ဇြပ်ဗုရောင် ညာတ်ကေတ်ရ။
နိဂီု
သရုပ်ထောအ်မ္ဂး ကံင်ဇြဳပၞာန်ဝွံ နူပေါဲရုဲမာဲတုဲဗက်ဂှ် ပရေင်ထပက်ပၞာန်ကီု ပရေင်င္ၚးတးတိဍာ်တအ်ကီု ကၠောန်ကၠုင်ဒၟံင်ရ။ သၟဝ်ကျာတွဵုရးဂှ် အကာဲအရာပရေင်ပၞာန် သ္ကာတ်မြဟ်ဒၟံင်တုဲ လ္ပာ်သၠုင်ကျာတွဵုရးဂှ် ပရေင်ထပက်ပၞာန်တအ် နွံကီုလေဝ် ဆၜိုတ်ပရေင်ပၞာန် ကြံင်မ္ၚိုဟ်ဟေၚ်ရ။ ရန်တၟအ်ကံင်ဇြဳပၞာန်ဂှ် ကၠာစၠတ်ထဝ် ဟွံဂွံစဏီဏအ်ဂှ် ပရေင်ဂီုကၠီုဂၠံင်ဍာန် မပ္တံ ဂၠံၚ်ကိစ္စဇၞော် ဂၠံၚ်ဇၞော်ကၟိန်ဍုၚ် စၟတ် (၈) တအ် ဂီုကၠီုသ္ဂောအ်နွံအာကီု သီုဍေံသ္ဂောံကလေၚ်ထိၚ်ဒဝ်အာကီုတုဲ စကာဒၟံင်ဇြဟတ်ဂှ်ရ အာဂတနူဏအ် ပေါဲဗတိုက် က္တဵုဒှ်ကၠုင် မာန်မံၚ်ဏီရောင်ဂှ် မ္ဒးပ္တိုန်ထ္ၜးဏာရအဴ။
