ပေါဲဗတိုက်တံ ညောန်ကြပ်ကၠုင် ဍုင်ဇၞော် ကေုာံ လညာတ်လတူ အေန်သဳအေ

သ္ၚဳဂၠိပ် ပရေင်ၜိုဟ်လလံ (ဂိတုအဝ်ဂေတ်)

ပ္ဍဲလိခ်သ္ၚဳဂၠိပ် ပရေင်ၜိုဟ်လလံ သွက်ဂိတုအဝ်ဂါတ်ဏံမ္ဂး ပရူပရာ ပရေင်ပဋိပက္ခပၞာန် အပ္ဍဲကၟိန်ဍုင်ဗၟာ အသိင်သၠုင်တိုန်ကၠုင်တုဲ မွဲကရောံဂှ် ပရူပရာညးဍုင်ကွာန်  ဒးဒုင်အိုတ်အာလမျီုလေဝ် လၟိဟ်ဂၠိုင်ဂၠင်တိုန်ကၠုင်ကီု၊ တုဲပၠန် ဂကောံရပ်လွဟ်ကောန်ဍုင်အရင် ကေုာံ ဂကောံပၠန်ဂတးဂမၠိုင်တံ ဇြဟတ်ခိုဟ်ကၠုင်တုဲ နူကဵုဒေသဂြိုပ်ကၞိင်မွဲကဆံင် အပ္ဍဲဍုင်ဇၞော်တံဂှ်လေဝ်  ထ္ပက်ပၞာန်မာန်ကၠုင်မံင်ကီု ပရူပရာသာ်ဝွံ ဗှ်လ္ၚတ်အာမာန်ရ။ သ္ပဟိုတ်ကဵု ဒပ်ကံင်ဇြဳပၞာန်ဗၟာတံ ကၠိလောန်မံင် ဒုဟ်ရာဇဝတ် နာနာဂှ်ရ လိက်ကသုက် ဒေါံပန်ပှော်အလုံကၟိန်ဍုင် (NCA) ဝွံ လီုလာ်အာယျရောင် ဂကောံရပ်လွဟ် ကောန်ဍုင်အရင်လ္ၚဵုတံ ၜိုန်ရ စှ်ေစိုတ်လဝ်ကီုလေဝ် ဂကောံလ္ၚဵုတံဝွံ ဆက်ဒ္ဂေတ်ဗက်မံင် အတိုင် လိက်ကသုက် (NCA) ရ။ ဟိုတ်သာ်ဂှ်ရ စပ်ကဵုလိက်ကသုက် (NCA) တုဲ ဂကောံမွဲကဵုမွဲ လညာတ် ဟွံတုပ်တဴကီု ကေုာံ လိက်ကသုက် (NCA) ဝွံ ညံင်ရဴပြယာဲ ပရေင်ဍုင်ကွာန် ဒပ်ပၞာန်ဗၟာ သက်က်ရောင် သွက်ဂကောံရပ်လွဟ် ကောန်ဍုင်အရင်ဂမၠိုင်တအ် မဒးကဵုဏာသတိ နလိခ်ဝွံရ။ တုဲပၠန် စပ်ကဵုပရေင်ကၟိန်ဍုင်ဗၟာတုဲ နဂကောံအာဇြဳယာန် (ASEAN)ဝွံ ဗီုပြင်လဵု ပါလုပ်ဆိုက်ဗ္ဒက်မံင် ဂှ်လေဝ် ချူပ္တိုန်ထ္ၜးလဝ်ရ။