ပရေင်ပၞာန်-၁၀၂၇၊ ပေါဲဗ္တိုက်တၟေင်ဂမၠိုင်ကဵု လညာတ်ကၟိန်ဍုင်သ္အာင်ဂမၠိုင်

စနူ သၞာံ (၂၀၂၁)၊ ဂိတုဖေဖဝ်ဝါရဳ ပၞာန်သီအဝဵုတုဲ ပရေင်ပၠန်ဂတး တမ်က္ညင်ဝွံ ရိုဟ်လၟိဟ်တ္ၚဲမ္ဂး ပေင်ကၠုင် (၁,၀၀၀) လ္ၚီတ္ၚဲ ကီုရ။ အတိုင်မွဲကၟိန်ဍုင်ဗၟာလေဝ် ပေါဲဗ္တိုက် နလၟိဟ် (၁၁,၀၀၀) အလန်ဟွံက ဒှ်ကၠုင်တုဲယျ။ ပွမဒးသောင်ကၠး ပြသၞာပရေင်ဍုင်ကွာန် လ္တူခုင်ဂှ် ဂကောံနာနာတံ ဟွံဗက်စ၊ ဝေင်ပါဲကၠေံတုဲ ရပ်စပ်စကာကၠုင် နနဲဝေင်ပၞာန်ဂှ်ရ အလုံကၟိန်ဍုင်ဗၟာမွဲ သ္ဂောံၜိုဟ်သြိုဟ်အာမာန်ဂှ် ဂၠံင်ဍာန် ဟွံမွဲဏီရ။ အပ္ဍဲဂိတုအံက်တဝ်ဗာဏံဝွံလေဝ် ဂွံဆဵုကၠုင် ပရေင်ချဳဒရာင်ပၞာန် တၟေင်င်တၟဟ်ဟ်ရ။ ဗွဲတၟေင်မ္ဂး ပ္ဍဲတွဵုရးဍုင်သေံ ဒေသ သ္ကုတ်သၟဝ်ကျာတေံရ။ ဒပ်ဂကူကဝ်က (MNDAA) တံ ပံင်တောဲက္ဍိုက်ပ် ကု မဟာမိတ်ကောဒေံ-သၟဝ်ကျာတံတုဲ ဗ္တိုက်သီကေတ် ဒပ်ကံင်သဳပၞာန်ဗၟာတံ ဗွဲမဂၠိုင်ဂၠင်မာန်ကၠုင်ဂှ် ဗွဲမအမ်သဝ် ဂွံဆဵုကေတ်ရ။ ညံင်ရဴတရဴ စဴဍုင်မိတိမ ဂကူကဝ်က (ကိုးကန့်) တံရောင် မိက်ဂွံဟီု ထိုင်သးရ။ ဒြဟတ်ပၠန်ဂတး မၞုံသ္ကုတ်သၠုင်ကျာ ကၟိန်ဍုင်ဗၟာတံဂှ်လေဝ် ထံက်ဂလာန်၊ ကဵုဇြဟတ်ပေင်င်တုဲ ချဳဒရာင်ကၠုင် ပရေင်ပၞာန် မွဲအခိင်ဓဝ်ရ။ ဟိုတ်နူမုက်ပၞာန် သၠဲလးကၠုင်ကီု၊ အသိင်ပၞာန် သၠုင်တိုန်ကၠုင်ကီုတုဲ ပ္ဍဲသၞာံဂတ (၂၀၂၄) ဏံမ္ဂး ပ္ၚံက်ပရေင်ဍုင်ကွာန် ပြံင်သၠာဲကၠုင်မာန်ရ။ ကာလဂှ်မ္ဂး ယဝ်ရ ဒးသဳကၠဳ ပရေင်ၜိုဟ်လလံတှ်ေ လ္ပဒုင်သ္ဇိုင်ကဵု လိက်ကသုက် ဒေါံပန်ပှော်အလုံဍုင် NCA ညိ။ စၟဳလေဝ် လ္ပစၟဳညိရ။ အလဵုအသဳ ကံင်သဳပၞာန်ဗၟာတံရ ဖံက်ပကဝ်လဝ် NCA ဂှ် ဂၠိုင်ကဵုဝါရ။ နဒြဟတ်ပၠန်ဂတး တမ်က္ညင်ဂမၠိုင်ကီု၊ ဂကောံရပ်လွဟ် ကောန်ဍုင်အရင် (EAO) ဂမၠိုင်တံကီုဂှ် ဟွံပတှ်ေစ NCA တုဲ ပေါဲသဳကၠဳပရေင်ၜိုဟ်လလံ ဒုင်သ္ဇိုင်ကဵု NCA တံဂှ်လေဝ် တိုန်စိုပ်ဟွံသေင်ရ။ ဟိုတ်ဂှ်ရ ရံင်ကဵုဌာန်ဂတကၟိန်ဍုင်ကီု၊ အပ္ဍဲကၟိန်ဍုင်ဗၟာ ပရေင်ၜိုဟ်လလံ ညံင်ဂွံတန်တဴအာ ထာဝရမာန်ရောင်တှ်ေ နဲကဲဟွံဒုင်သ္ဇိုင်ကဵု NCA၊ နဲကဲတၟိဂှ် ဒးဂၠိုက်ဂၠါဲရောင်။ နဲကဲတၟိ ညံင်ဂွံမံက်ဂတဝ်ကီု၊ မံက်ဂတဝ်တုဲ ညံင်ဂွံဓမံက်ရုပ်ရဴမာန်ဂှ်တှ်ေ ဂကောံဂၠးကဝ် ဗွဳုင်ကၟိန်ဍုင်သ္အာင်တံ ပါလုပ်တုဲဟေင် အံင်ဇၞးမာန်ရောင်။