ပၠန်ဂတးတုဲမှ က္လေၚ်စဴသ္ၚိဏောၚ်

ချူ – ယက္ခဂုမ္ဘဏ်

“အဓိကဂှ်တှ်ေ သွက်သ္ဂောံတဝ်စၞေဟ်ကဵုတၠအဝဵုပၞာန်ရ။ ဟွံမိက်မံၚ် သၟဝ်တဲတၠအဝဵုတံရ” ညးမဟီုဂးဏာ သာ်ဏံဂှ်သၟတ်အာယုက် ၂၀ သၞာံပြၚ်မွဲတၠရ။

          တၚ်ရန်တၟံညးတေံဂှ် သောၚ်ကၠးတုဲ ပိုတ်သ္ကုတ်ရ။ ညးတေံ ဟွံမွဲပၟိက်ကဵုသၞောတ်တၠအဝဵုပၞာန်တုဲ ဇၟာပ် သၞောတ်တၠအဝဵုဂှ် ဗတိုက်သရိုဟ်ထောံရောၚ် ဖျေံလဝ်သ္ဂုတ်သွာတ်ရ။ ညးတေံဂှ် မၞုံယၟုမာံဆာန်လောန် နူကဵုကွာန်မၞုံ  ပ္ဍဲပွိုၚ်ဍုၚ်ရေဝ်သၟဝ်ကျာ  ဒေသမန်မွဲတၠရ။

          လောန်ကၠုၚ်နူကဵု ဂိတုဖေဖဝ်ဝါရဳ ၁၀ တေံ နူကဵုကံၚ်ဇြဳပၞာန်တံ ထမံက်ပတိုန်ရုပ်ရဴ ဥပဒေဟွံယိုက် ဂၠေၚ်ဒၠေၚ်ပၞာန်မံၚ်ဟွံဂွံ၊ သၟတ်အာယုက်စိုပ်တုဲတံ သွက်သ္ဂောံ ယိုက်ဂၠေၚ်ဒၠေၚ်ပၞာန် နနဲအဓမ္မ ညး              လျိုၚ်အုပ်ဓုပ်ကံၚ်ဇြဳပၞာန်တံ ဗက်ပကောံပကေဝ်ကၠုၚ်မၞိဟ်တုဲ ညးလ္ၚဵု ဂြိပ်ပါဲဒလေတ်အာ ဍုၚ်မ္ၚးတံလေဝ်နွံ၊ ညးလ္ၚဵု ဂြိပ်ပါဲဒလေတ် စိုပ်အာတိဍာ်ဗၠးၜး လုပ်အာပ္ဍဲဂကောံပၠန်ဂတး ရပ်လွဟ်တံလေဝ်နွံရ။

ဟိုတ်နူအကာဲအရာဂှ်တုဲ ဖျေံကၠုၚ်သ္ဂုတ်သွာတ် သွက်သ္ဂောံက္လေၚ်ဗတိုက်သရိုဟ်ကၠေံ ကံၚ်ဇြဳပၞာန် ရ။ ပ္ဍဲကဵုသၟတ်တံ ဗွဲမဂၠိုၚ် ရုဲစှ်ကေတ် ဂၠံၚ်တရဴရပ်လွဟ် လုပ်စိုပ်ကၠုၚ်လဝ် ပ္ဍဲကဵုဒပ်ပၠန်ဂတးဍုၚ်မန်ဂှ် မာံဆာန်လောန်လေဝ် ပါလုပ်လၟိဟ်မွဲတၠကီုရ။

 “ပ္ဍဲကဵုဍုၚ်မွဲမွဲဂှ် အုပ်ဓုပ်အာ နကဵုသၞောတ်တၠအဝဵုပၞာန်ဂှ် ဒှ်ဟွံထေက်လေဝ်။ ဟိုတ်ဂှ်ရ      အဲဂှ် နကဵုသၟတ်မွဲတၠ အုပ်ဓုပ်နကဵုသၞောတ်တၠအဝဵုပၞာန်ဂှ် ဗီုလဵုပလေဝ် ဒုၚ်တဲဟွံမာန်ရ။              ဒၟါနူဂှ်ရ နကဵုစိုတ်ဓာတ် သၟိက်မိက်ဂွံက္လေၚ်တဝ်စၞေဟ် သၞောတ်တၠအဝဵုအိုတ်သီုဂှ် ကၠုၚ်စိုပ်ဒၞါဲဏံကၠုၚ် တိုန်စိုပ် ဘာဗ္တောန်ကွတ်ပၞာန်ဏံရ” ညးမတိုန်စိုပ်ဒၟံၚ် ဘာဗ္တောန်ကွတ်ပၞာန် ပ္ဍဲကဵုဒပ်ပၠန်ဂတးဍုၚ်မန် မာံဆာန်လောန်ဟီုရ။

          နူကၠာပၞာန်ဟွံသီအဝဵုဏီ မာံဆာန်လောန်ဂှ် ဗ္တောန်ဒၟံၚ်ပညာသဇိုၚ် ပ္ဍဲကဵုဘာတန်သမၠုၚ် ဍုၚ်မတ်မလီုရ။ ပ္ဍဲကဵုသၞာံ၂၀၂၀ဂှ် ဟိုတ်နူအပါ ဒးထောံအာတုဲ တိတ်ကၠေံနူဘာ မ္ဒးဆက်ကေတ်လျိုၚ်ဝါဗ္ၚအပါ ညးတေံ ကၠောန်လဝ် ဟွံတုဲဒှ်ဏီတံဂှ်ရ။

           မာံဆာန်လောန်ချပ်ဇန်လဝ် ပ္ဍဲစိုတ်တေံ ဝါဗ္ၚသွက်သၞာံဂတတေံမ္ဂး ဖျေံဗီုလိၚ်ကၠေံတိ ကဵုညးသ္အာၚ် ကၠောန်တုဲ မာံဆာန်လောန် ဆက်တိုန်ဘာပၠန်ရောၚ် ပတဝ်လဝ်ဂၠံၚ် သွက်ပရေၚ်ပညာရ။ ၜိုန်ဂှ်လေဝ် ဂလာန်ညးတမၠာ ဟီုဂးလဝ် “ဗီုဇကုချိၚ် သၟိၚ်ဟွံစၟတ်” သက္ကရာဇ်ခရေတ်ပြံၚ် စိုပ်ဂိတုဖေဖဝ်ဝါရဳ၁ဂှ် ပၞာန်သီ ကၠေံအဝဵုတုဲ ဘာဂှ်လေဝ်ဟွံဒှ်တိုန် မ္ဒးဆက်ကၠောန်အာကမၠောန် ပ္ဍဲကွာန်ဇကုရ။ ဟိုတ်နူပၞာန်သီအဝဵုတုဲ ပရေၚ်ပညာဂှ် သာတုဲသ္ၚောဲခြာတိတ်အာရ။

            ဒပ်ပၞာန်သီအဝဵုတုဲ ဒပ်ပၞာန်တံဓဇန်ကြမ်ကြ ပျဲပျာံ၊ ဂစိုတ်လ္တူညးဍုၚ်ကွာန် ဟွံမွဲကဵုဗဗွဲဓဝ် ဂွံဆဵု၊ ဂွံမိၚ်မံၚ် ဟွံဂွံသ္ကုတ်ခြာတုဲ ပ္ဍဲဂၠံစိုတ်တေံ ဒုၚ်စသိုၚ်ဝါတ် ၜိုန်ရသၟိက်မိက်ဂွံက္လေၚ်တဝ်စၞေဟ် နကဵုလွဟ်ကီု လေဝ် ဟိုတ်နူကဵုဟိုတ်နာနာသာ်တုဲ ဒှ်အာဆသွပ် ချပ်မံၚ်ပ္ဍဲစိုတ်တေံသၟးရ သာ်ဏံ မာံဆာန်လောန် ဟီုထ္ၜး တဴရ။

 “ကၠာကၠာတေံဂှ် သွက်သ္ဂောံရပ်လွဟ်ဂှ် စိုတ်ရနွံ၊ ဗီုလၟုဟ်ဟွံသေၚ်။  အခိၚ်တေံ   ဟိုတ်နူကဵုဟိုတ် နာနာသာ် ပရေၚ်ထတ်ယုက်လေဝ် ဟွံခိုဟ်၊ အပါဟွံမွဲတုဲ ကမၠောန်ဝါဗ္ၚဂှ်လေဝ် ဒးရံၚ်စံၚ်တုဲ ချပ်တုဲ ဟဲအာ ချပ်တုဲဟဲအာရ။ လက္ကရဴဏံ  ဥပဒေဇၟာပ်မၞိဟ်  အဝဲစိုပ်ဒးယိုက်ဂၠေၚ်ဒၠေၚ်ပၞာန်ဂှ် မံက်တိတ် ကၠုၚ်တုဲ  သွက်သ္ဂောံရပ်လွဟ်ဂှ်  ဥပဒေဂှ်  ဗီုကဵုဓရိုဟ်ပလံၚ်ဏာကဵုအဲရ” မာံဆာန်လောန်ဟီုရ။

လၟုဟ်ဏောၚ်ဟီုတှ်ေ မာံဆာန်လောန်ဂှ် တိုန်စိုပ်ဒၟံၚ် ဘာဗ္တောန်သဇိုၚ်ကွတ်ပၞာန် ပ္ဍဲကဵု ဒပ်ပၠန်ဂတး ဍုၚ်မန် ပါလုပ်ပ္ကတ်ပ္ကေၚ်ဒၟံၚ် ပ္ဍဲပၠန်ဂတးရ။ ပ္ဍဲကဵုတန်ဗ္တောန်ဂှ် သွက်ပရေၚ်ထတ်ယုက် ခန္ဓကာယ ကတဵု ပြဟ်ပြဟ်တုဲ ဂြိပ်၊ ချဳဓရာၚ်ဇိုၚ်တဲ၊ သ္အာၚ်နူဂှ် ခန်ဗ္တောန်ကွတ် သ္ကာတ်မြဟ်၊ ဝါတ်တ်တံလေဝ် ပါလုပ်မံၚ်ရ။

          ပ္ဍဲအခိၚ်ကာလ ဗ္တောန်ကွတ်ပၞာန်ဂှ် ဍောၚ်ၜိုတ်ဒၟံၚ် ဟွံတုပ်ကဵုဗီုချပ်လဝ်ပ္ဍဲစိုတ် လောန်ကၠုၚ်တေံရ။ ၜိုန် ဂှ်လေဝ် စိုတ်ဓာတ်သၟိက်မိက်ဂွံတဝ်စၞေဟ်ကဵု သၞောတ်တၠအဝဵုပၞာန်တေံ သ္ကာတ်မြဟ်မံၚ်တုဲ ဟွံဒုၚ်ဖအောန် ကၠေံဇဲလွဳရောၚ် မာံဆာန်လောန်သ္ဂးရ။

          “နူဂယးတှ်ေ ၅ နာဍဳ ကဝက် ကတဵု၊ တုဲတှ်ေ လာၚ်မုက်မတ် ဟပဝ်ဇိုၚ်တဲ၊ တုဲတှ်ေ ရေၚ်ညဳညဳ၊ ဂြိပ်PT ရ။ ဒးဂြိပ် ဗၞတ်၂ နာဍဳကဝက်၊ တုဲတှ်ေ စစၞဂယးရ။ သွလေဝ်ဂွံစမံၚ်ကီုရ။ ပ္ဍဲတန်ဗ္တောန်ဂှ် စဳပၞောန်ဇၞော်တုဲ ဇၟာပ်ကောန်သ္ဂံၚ် မၞုံကဵုပရေၚ်က္လၚ်ပၟိၚ်ရ။ ၜိုတ်ဇကုချပ်ကူလဝ် နူကဵုသွပ်ဇကုဂှ် သာတုဲ ဍောၚ်ၜိုတ်တဴရ။ ဆ္ဂးတှ်ေ ပ္ဍဲစိုတ်တေံဂှ်တှ်ေ ကၠောန်မှဂွံဏောၚ် ဒုၚ်ဂိုၚ်ကေတ်လဝ်တုဲ ဆက်ကၠောန်အာ သီုကဵုဟွံဖအောန်ကၠေံဇဲလွဳရ” ညးတေံ သ္ဂးရ။

          ဥပဒေ ဇၟာပ်မၞိဟ် အဝဲစိုပ် ဒးယိုက်ဂၠေၚ် ဒၠေၚ်ပၞာန်ဂှ် မံက်တိတ်ကၠုၚ်တုဲ သၟတ်ဟွံမိက်ယိုက်ဂၠေၚ်ပၞာန် ပ္ဍဲဒပ်ကံၚ်ဇြဳပၞာန်တံ ဗွဲမဂၠိုၚ် လုပ်စိုပ်ကၠုၚ် ဒပ်ပၠန်ဂတးတံ ဗွဲမဂၠိုၚ်ရောၚ် ညးတာလျိုၚ် ဒပ်ပၠန်ဂတးတံ ဟီုဂး ဒၟံၚ်ပ္ဍဲဌာန်ပရိုၚ် ဂွံမိၚ်ကေတ်ရ။

          တၠုၚ်လအာညံၚ်ရဴမာံဆာန်လောန်ကီု သၟတ်အာယုက် ၂၀ သၞာံပြၚ် မာံဂံၚ်ဆာန် နူကဵုကွာန် မၞုံပွိုၚ်ဍုၚ်ဇြပ်ဗုမွဲတၠ ဟိုတ်ဒၟါနူကဵု ဥပဒေဇၟာပ်မၞိဟ် အဝဲစိုပ် ဒးယိုက်ဂၠေၚ်ဒၠေၚ်ပၞာန်ဂှ် မံက်တိတ်ကၠုၚ်တုဲ စိုပ်ဒပ်ပၠန်ဂတးမန် သွက်သ္ဂောံလုပ်အာ ပေါဲဗတိုက်ကဵုတၠအဝဵုကံၚ်ဇြဳပၞာန်ကီုရ။

          “နူကဵုသ္ၚိတေံ မိမအဲတာဒၞါပဒေါံ ဟွံကဵုအာပၞာန်ရ။ ၜိုန်ညးပဒေါံမံၚ် ထပ်ကဵုထပ်ကီုလေဝ် အဲကၠတ်တိတ်ကၠုၚ် ဒဵုဂွံရ။ ဂွံစိုပ်ကၠုၚ်အဏံဂှ် နကဵုတၚ်ခက်ခုဲနာနာသာ်ရ” မာံဂံၚ်ဆာန် ဟီုထ္ၜးရ။ အကြာမိမဟွံတုပ်စိုတ် တာဒၞါဒၟံၚ်ဂှ် ဂွံတိတ်ကၠုၚ်ဂွံဂှ် သွက်မာံဂံၚ်ဆာန်မွဲ လောဲမံၚ်ဟွံသေၚ်ရ။

            “တိုန်ဘာကွတ်ပၞာန်ဂှ် မိပ်လေဝ်မိပ်၊ အောန်စိုတ်လေဝ် အောန်စိုတ်ရ။ မုဒှ်ရောဟီုတှ်ေ အဏံဂှ် ဟွံတုပ်ကဵုပ္ဍဲသ္ၚိဇကုပုဟ်လေဝ်။ ဒးဆဵုဂဗကဵုတၚ်ခက်ခုဲ ဆိုအ်ဗနာနာသာ်ရ။ ဒးတိုန် ဘာပၞာန် ပွိုၚ်မွဲဂိတု ပေၚ်ၚ်ရ။ ပရေၚ်စသုၚ်ဟီုတှ်ေ လ္ဆောဝ်ဒးဗီု လ္ဆောဝ်ဟွံဒးဗီု၊ ဍာတ်မွဲအလန်    က္တၚ်မွဲအလန်ရ။ ဆ္ဂးတှ်ေ  မုဒှ်ဒှ်လေဝ်  သွက်ဂကူဇကုသ္ဂောံက္လိဂွံ  အခေါၚ်ဗၠးၜးဂှ်တှ်ေ     ပရံၚ်အာ စိုတ်ဓာတ်ရ” မာံဂံၚ်ဆာန် ဟီုရ။

ကံၚ်ဇြဳပၞာန်ဂှ် ကောန်သ္ဂံၚ်ညးတံ လေၚ်ယအ်အာလဝ်တံ သွက်သ္ဂောံထပ်ဗပေၚ်ဂှ် မ္ဒးပတိတ် ဥပဒေ ဟွံယိုက်ဂၠေၚ် ဒၠေၚ်ပၞာန် မံၚ်ဟွံဂွံ သာ်ဏံဂှ် ဒှ်အာဒြဟတ်ဓရိုဟ် သွက်သၟတ်တံ သ္ဂောံလုပ်ယိုက်ဂၠေၚ် ဒၠေၚ် ပၞာန် ပ္ဍဲဒပ်ပၠန်ဂတးတံရ။ သၟတ်ဗွဲမဂၠိုၚ်တံဂှ် မံၚ်ဟွံဂွံ ဒးလုပ်ယိုက်ဂၠေၚ် ဒၠေၚ်ပၞာန်တုပ်ပ်မ္ဂး စၞးသ္ဒးလုပ်ပၞာန် ပ္ဍဲကံၚ်ဇြဳပၞာန်ဂှ် လုပ်ယိုက်ဂၠေၚ် ဒၠေၚ်ပၞာန် ပ္ဍဲဒပ်ပၞာန်ပၠန်ဂတးတံရ။

           ဟိုတ်ဒၟါနူဥပဒေ ဟွံယိုက်ဂၠေၚ် ဒၠေၚ်ပၞာန် မံၚ်ဟွံဂွံဂှ်တုဲ ဒြဟတ်ဒပ်ပၞာန်ပၠန်ဂတးတံ ဇၞော်ကၠုၚ်ရ။ အတိုၚ်ကံၚ်ဇြဳပၞာန်တံ စၟဳကေတ်ဂှ် ဟွံဒှ်ကၠုၚ်ကွေံကွေံတုဲ လ္ပာ်ဒပ်ပၠန်ဂတးတံဟေၚ် သာကၠုၚ်မံၚ် ဂွံဆဵုကေတ်ရ။ ညးဒစဵုဒ္စးကဵုဥပဒေတံဂှ် ကေတ်အာအရေဝ်ရောၚ် ၜိုန်ရကံၚ်ဇြဳပၞာန်တံ ဟီုလလောၚ် ပတိတ်လဝ်ကီုလေဝ် သၟတ်တံ ဟွံက္လၚ်မွဲသာ် တိတ်ကၠုၚ်တိဍာ်ပၠန်ဂတးရ။

         “အဲဏံဟီုတှ်ေ ပ္ဍဲပၠန်ဂတးဏံ ၜိုတ်အဲသ္ပမာန် ဂိုတ်ဂစာန်တုဲ ရီုဗၚ်အာဏောၚ်။ တုဲတှ်ေ စိုပ်မွဲတ္ၚဲ ပေါဲပၠန်ဂတးဏံတုဲအာမ္ဂး အဲက္လေၚ်စဴသ္ၚိဏောၚ်” မာံဆာန်လောန်ဂှ် အတိုၚ်ပၟိက်ညးတေံ မချပ်လဝ် ညးတေံဟီုပတိတ်ရ။ ညးတေံဆက်တုဲ ဟီုအာပၠန်ဂှ် “သ္ၚိဂှ် ဗှ်မံၚ်သၞာ လၟိုန်ကာလရ။ ဆ္ဂး ၜိုတ်လဵု ဗှ်သၞာ ဗှ်သၞာ အဲဟွံက္လေၚ်စဴသ္ၚိဏီပုဟ်။ စိုပ်တ္ၚဲပၠန်ဂတးတုဲဒှ်အာမှ က္လေၚ်စဴသ္ၚိဏောၚ်”