ပ္ဍဲတမ်လိခ်ဏံဝွံ ပရူဝေင်ပၞာန် နကဵုပၞာန်ကျာဂှ် ဗွဲတၟေင် ဓမံက်ထ္ၜးလဝ်ရောင်။ ပ္ဍဲအရာဝေင်ပၞာန် ဗ္တိုက်နကဵုပၞာန်ကျာဝွံ လ္ပာ်ဒပ်ကံင်ဇြဳပၞာန်ဗၟာတံသၟး ဟွံသေင် သီုကဵုလ္ပာ်ဒြဟတ်ပၠန်ဂတးတံလေဝ် သုင်စောဲဗတိုက်ကၠုင်ဂှ် ဂွံဆဵုကေတ်ရ။ ဟီုသာ်ဏံတှ်ေ ခယျကေတ် လ္ပာ်ဒြဟတ်ပၠန်ဂတးတံ နွံကၠုင်ကဵု က္ၜင်ကျာပၞာန်ယျရောင် ဒှ်သၠေဟ်ပၟာလေပ်ရ။ ပၞာန်ကျာ လ္ပာ်ဒြဟတ်ပၠန်ဂတးတံ သုင်စောဲမံင်လၟုဟ်ဝွံ ကိရိယာစက်ကျာ ညးကော်ခဴစ “ဒရုင် (Drone)” ရ။ လ္ပာ်ဒြဟတ်ပၠန်ဂတးတံ သုင်စောဲကၠုင် နဲကဲ ဂတာပ်ခေတ် ပညာသိပ္ပံသၠုင်ဂှ်ရ လ္ပာ်ကံင်ဇြဳပၞာန်ဗၟာတံ ဒးဒုင်ကၠုင် ဘဲဂိ ဇၞော်ကဵုဇြဟတ်ရ။ ဟိုဟ်ဒှ်သာ်ဂှ်ရ ဒရုင်ဂမၠိုင် ညံင်ဟွံဂွံ ထပ်စိုပ်အာ ဇရေင်တဲ ဒြဟတ်ပၠန်ဂတးတံမာန်ကီု၊ ညံင်သ္ဂောံထိင်ဒဝ်အာ ပရေင်ဗ္တိုက်ပၞာန် ဒရုင်မာန်ကီုဂှ် ကံင်ဇြဳပၞာန်ဗၟာတံ ဒဵုကဵုက္ဆံင် ဒးအာတ်မိက်ခစ ဇရေင်အလဵုအသဳကြုက်တံ ဒှ်ကၠုင်ရ။ ပ္ဍဲလိခ်သ္ၚဳဂၠိပ် သွက်ဂိတု သက်တေမ်ၜါ (September) ဏံမ္ဂး –
- သ္ပဟိုတ်ကဵု ဒြဟတ်ပၠန်ဂတးတံ ဆိုက်ဗ္ဒက်ဘပဠကၠုင် ဍုင်နေဗျဳဒဝ်ဂှ်ရ ကံင်ဇြဳပၞာန်ဗၟာတံ ဗ္တိုက်သုင်စောဲကၠုင် ပၞာန်ကျာဂၠိုင်တိုန်။
- ပ္ဍဲတွဵုရးဍုင်မန် ကေုာံ တွဵုရးဍုင်ကရေင်ဂှ် ပွိုင်မွဲဂိတုဓဝ် လ္ပာ်ဒြဟတ်ပၠန်ဂတးတံ ဓမံက်ကၠုင်ပရေင်ပၞာန်ကျာ နကဵုဒရုင်ဂှ် လၟိဟ် (၁၂) ဝါဟွံက နွံကၠုင်။
- တင်ၜတ်ကၞာတ် အကြာဝေင်ပၞာန် နကဵုဒရုင် ကေုာံ နကဵုက္ၜင်ကျာပၞာန်ဂှ် ဗှ်အာမာန်တုဲ စပ်ကဵုပရေင်ကၟိန်ဍုင်ဗၟာဂှ် ကၟိန်ဍုင်သ္အာင်ဂမၠိုင်တံ လညာတ်သာ်လဵုနွံ ပရူပရာသာ်ဝွံ ဩဝ်ဗှ်သ္ၚဳအာမာန်ရ။
