■သွဟ်ပေဲါရုဲမာဲ ဒကုတ်၁ မကၠောန်လဝ် ပ္ဍဲဒဳဇြေမ္ဗာ ၈၊၂၀၂၅ဂှ် ကမ္မယျှေန်ပေဲါရုဲမာကၟိန်ဍုင်(UEC) လလောင်တြးဒၟံင် အဆက်ဆက်ရ။အတိုင်မွဲကၟိန်ဍုင် ဗော်ဇာဒိသိုင်တအ် မာန်လဝ်ဗဒဲါ ၁၀၀က္ဍိုပ်ကၠမ်ကီုလေဝ် ပ္ဍဲတွဵုရးဍုင်မန် ပွိုင်ဍုင်ၜါသွာင်(တ္ကအ်ခၟိုင်)ဂှ် ကျလဝ် ၂ဒၞဲါရ။ဗော်ညဳသၟဟ်မန် မာန်လဝ်ပ္ဍဲစၠတ်ထဝ်သီု၂ကီုလေဝ် ပ္ဍဲ စၠတ်ထဝ်တွဵုရးဂှ် ဟိုတ်နူ မာဲဒစး/မာဲကရတ် (ကြိုတင်မဲ) ဂှ်ရ ဒးကျအာဂှ်လေဝ် အကြာညးဍုင်ကွာန်တအ် အသိင်ပရေင်ပါ်ပဲါတအ်ဂှ် သၠုင်တိုန်ကၠုင်ရ။ သွက်အမာတ်MUP မတိုန်စိုပ် ပ္ဍဲစၠတ်ထဝ်အလန်ဏအ်ဂှ် သွက်သဂွံထမံက်ရုပ်ရဴ အတိုင်ကဝတ်ကဝတ်ပေါဲရုဲမာဲဗော်ညးတံ မပ္တိတ်လဝ်ဂှ်ကီု သီု ပရေင်ရုင်တၟံချး ညးဍုင်ကွာန်တအ် မဒစဵုဒစးတးပဲါဒၟံင်တအ်ဂှ် ဒှ်ကၠုၚ်တၚ်ကော်ဆောဇၞော်ဇၞော်မွဲရ။
၁။ သွဟ် ၜါသွာင် ကေုာံ ကဏ္ဍညးမဇၞးမာဲ ပိတၠ
➤နာဲအမ်ဆာန်မန်(က)မင်းစိုးခိုင် (စၠတ်ထဝ်ကောန်ဂကူ)
အတိုင်လိခ်လလောၚ် သၞာံတၟိ ဂျာန်နဝါရဳ (၈)မပါလုပ်ဂှ်မ္ဂး နာဲအမ်ဆာန်မန်ဝွံ ညးဇၞးလဝ်မာဲ ပ္ဍဲတိဍာ်ဆန္ဒမာဲ စၟတ်(၄)ရ။ပေဲါဇၞးညးတေအ်ဂှ် ထ္ၜးဒၟံင်သက်သဳ ဒဒှ်ရပ္ဍဲဒေသၜါသွာင်ဂှ်ညးမထံက်ဂလာန် ကုဗော်ညဳသၟဟ်မန်နွံဒၟံင် ဗွဲမခိုင်ကၠိုက်ရောင်။နကဵုညးတေအ် ပ္ဍဲပရေင်ပြုပြေင်ဥပဒေကဆံင်ကၟိန်ဍုင်ဂှ် စဵုဒၞါကဵု အခေါင်အရာဂကူမန် ဗီုလဵုမာန်ရောဂှ် မဒှ်တင်သ္ဒးမင်ရံင်ကျောဝ်ရ။
➤မင်းစိုးသူ(စၠတ်ထဝ်ညးဍုင်)
နကဵုမမာဲမခိုင်ဗိုန် ၂၃၀၀၀မဂှ် ဇၞးအာ ညးစၞးUSDP ပိုတ်ပိုတ်ရ။ညးတေအ်ဝွံ ဂွံအာယုက်(၂၉)ညိကီုကွေဟ်တုဲ ဒှ်အမာတ်အာယုက်မဍောတ်အိုတ်ရ။နကဵုဇြဟတ်သၟတ်တအ်တုဲ ၜိုတ်လဵုပလံင်ဗစိုပ်ကဵုစၠတ်ထဝ် ရမျှာင်ညးဍုင်ကွာန်တအ် မာန်ရောဂှ် ဒှ်တင်စိုတ်သ္ဒးလုပ်စရ။
➤ဦးအောင်ကြည်သိန်း(စၠတ်ထဝ်တွဵုရး-သကိုပ်ဝန်ဇၞော်တွဵုရး)
ညးမဒှ်သကိုပ်ဝန်ဇၞော်တွဵုရးဍုၚ်မန် ပစ္စုပ္ပန်ဏအ်ဂှ် ဇၞးအာလဝ် နကဵုမာဲဒစး/မာဲကရတ် (ကြိုတင်မဲ) ရ။ညးတေအ်ဝွံ ဂွံလဝ်မာဲ ပ္ဍဲရုင်မာဲ ၁၉၀၀၀ဓဝ်ကီုလေဝ် ဟိုတ်နူမာဲကရတ် (ကြိုတင်မဲ) ၂၁၀၀ပြင်တအ်တုဲ ပံင်သရောပ်မ္ဂး ဂွံအာ မမာဲ ၂၁၀၀၀ပြင်တုဲ ဇၞးအာရ။ဆောညးတေအ် နာဲထောန်(ဦးနိုင်ထွန်း) နူဗော်ညဳသၟဟ်မန် မာန်လဝ် နကဵုမမာဲ ၂၀၀၀၀ပြင်ကီုလေဝ် ဟိုတ်နူမာဲကရတ်တုဲ ဒးကျအာဂှ် ဒှ်ဒၟံင်သၠေဟ်ပၟာအကြာညးဍုင်ကွာန်တအ်ရ။
၂။ အန္တရာယ် မဇၞော်အိုတ် ပ္ဍဲတ္ကအ်ခၟိုင် – ရုင်ကမၠောန်တၟံချး
ပ္ဍဲကာလလၟုဟ်ဏအ် ညးဍုင်ကွာန်ၜါသွာင်တအ် မဂွိင်တဴအိုတ်ဂှ် ပရေၚ်သွက်သဂွံသိုင်ခၞံ ရုင်ကမၠောန်တၟံချး အကြာကွာန်ကလုဲ ကဵု ကွာန်ဒဵုကြေဝ်ဂှ်ရ။ရုင်ကမၠောန်ဏအ်ဂှ် ဒှ်အန္တရာယ် ဇၞော်ကုဇြဟတ် သွက်ပွဳပွူတအ်တုဲ ညးဍုင်ကွာန်တအ်လေဝ် ညးလဵုမွဲမှ ဟွံမွဲပၟိက် အန္တရာယ်ဇမၞော်ဏအ်ပုဟ်ဂှ် ညာတ်ကေတ်ရ။
တမၠာတေအ်လေဝ် ညးဍုင်ကွာန်တအ် ဒစဵုဒစးဒၟံင်ပရေင်ဏအ်ကီုလေဝ် ဟိုတ်နူတၠအဝဵုတအ် ဆက်ဂ္စါန်ဒၟံင် သွက်သဂွံထမံက်ရုပ်ရဴဂှ်ရ တင်စၟဳစညးဍုင်ကွာန် မနွံလတူ အမာတ်တိုန်စၠတ်ထဝ်တၟိတအ် သၠုင်ဒၟံင်ရ။
၃။ ဒတူလိုင် ကရောမ်ဍုင်ကွာန်ဟာ
ပ္ဍဲလိခ်လလောၚ်တြးပေဲါရုဲမာဲ MUP ဂှ် “ပြဿနာပရေင်ဍုင်ကွာန်ဂှ် သ္ဒးသောင် ကုနဲကဲပရေင်ဍုင်ကွာန်” ကေုာံ “ကဵုက္ဍိုပ်ကုအခေါင်အရာကောန်ဍုင်အရေင် သီုပရေင်ပိုန်ဒြပ်ပ္ဍဲဒေသ”တအ် ပါလုပ်ဒၟံင်ရ။
ဆေင်စပ်ကဵုပရေၚ်တ္ကအ်ခၟိုင်ဏအ်တုဲ ပၞောဝ်ကဵုအမာတ် ၃တၠဏအ် ညးဂှ်ဒတူလိုင်ကရောမ်ညးဍုင်ကွာန် ၜါသွာင်တအ်ဇေတ်ဍာံဂှ် ဆေင်စပ်ကုရုင်ကမၠောန်တၟံချးတုဲ တင်ဟီုပတိတ်ဒတူလိုင်တအ်ဂှ် ဖျေဟ်ဏာကဵုသ္ဂုတ်သွာတ်ရ။
ဆက်ကွာ်အာ အတိုင်ကတိကဝတ် ဗော်ဟာ၊ဗက်အာလက္ကရဴလာဘ်ဗဇဴပိုန်ဒြပ် မနွံလက္ကရဴ ရုင်ကမၠောန်ဏအ်ဟာဂှ် ဒှ်ကၠုင် သၟာန်မတုပ်သၟဟ်ကုလမျီုကောန်ဍုင်ကွာန်တ္ကအ်ခၟိုင်တအ်ရ။ပ္ဍဲဗလးပရေင်ဍုင်ကွာန် အနာဂတ်ဏအ် ညးမဇၞးလဝ် နကုမာဲကရတ် နာဲအံင်ကျဳတုင်ဝွံ ပ္ဍဲစၠတ်ဓဝ်တွဵုရးဂှ် ပဲါနူရုင်ကမၠောန်တၟံချးဏအ်တုဲ သွက်သဂွံထမံက်ရုပ်ရဴ Mega Project မနွံပ္ဍဲတွဵုရးဍုင်မန်ဂှ် ဂ္စါန်ကၠုင်မာန်ရောင်။အကာဲအရာဏအ်ဂှ် အမာတ်မန် MUP ၂တၠတအ် ပ္ဍဲစၠတ်ထဝ်ကၟိန်ဍုင်ဂှ် ပါလ္ပာ်ညးဍုင်ကွာန်တအ် ၜိုတ်လဵုပတိုန်ထ္ၜးကဵုမာန်ရောဂှ် သ္ဒးမင်ရံင်ကျောဝ် ဗွဲမစိုတ်လုပ်စရ။
